Fótboltaævintýri í Verona

Emil Hallfreðsson, sem var landsliðsmaður í fótbolta, hefur stofnað EH-akademíuna á Ítalíu. Hann og kona hans, Ása María Reginsdóttir, bjóða íslenskum krökkum að koma í fótboltanámskeið í Verona.

Emil bjó í 20 ár á Ítalíu og vill nú gefa til baka til íslenskra barna. Á síðustu þremur árum hafa yfir 600 krakkar komið í heimsókn til að læra fótbolta. Hóparnir eru litlir, aðeins 30 krakkar í einu, svo Emil og þjálfararnir geti sinnt öllum vel.

Krakkarnir fá æfingaföt og hótelfatnað á staðnum, svo þau þurfa bara að taka með sér takkaskó og nærbuxur. Emil segir að þau eigi að upplifa sig eins og atvinnumenn og njóta þess að vera í góðum aðstæðum.

Þjálfarar frá Hellas Verona hjálpa til við æfingarnar og Emil er með á öllum æfingum. Hann segir að það sé krefjandi en mjög skemmtilegt að vinna með krökkunum. Ása segir að litlir hópar geri það að verkum að allir kynnist betur.